"मुंबई पुणे मुंबई २" आणि "कट्यार काळजात घुसली"

आज "मुंबई पुणे मुंबई २" आणि "कट्यार काळजात घुसली" हे दोन बहु-प्रतिक्षीत मराठी चित्रपट प्रदर्शित झाले, या दोन्ही चित्रपटांना सलमान खान यांच्या ''प्रेम रतन धन पायो" या हिंदी चित्रपटासोबत स्पर्धा करावी लागणार आहे.

"मुंबई पुणे मुंबई २" हा २०१० साली प्रदर्शित झालेल्या "मुंबई पुणे मुंबई" या सुपरहिट चित्रपटाचा सीक्वल आहे. "मुंबई पुणे मुंबई" या चित्रपटातून स्वप्निल जोशी आणि मुक्ता बर्वे हि नविन जोडी मराठी चित्रपट सृष्टिला मिळाली होती. या जोडीच्या केमिस्ट्रीमुळे "मुंबई पुणे मुंबई" हा चित्रपट खुप गाजला होता. हिच जोडी "मुंबई पुणे मुंबई २" या चित्रपटाची युएसपी आहे. या जोडीसोबतच श्रुती मराठे, प्रशांत दामले, सविता प्रभुणे, आसावरी जोशी, सुहास जोशी, मंगल केंकरे आणि विजय केंकरे यांच्या चित्रपटात प्रमुख भूमिका आहेत. या चित्रपटाचे दिग्दर्शक सतीश राजवाडे आहेत. 

आज प्रदर्शित झालेला दूसरा चित्रपट म्हणजे "कट्यार काळजात घुसली", या चित्रपटाच्या निमित्ताने प्रख्यात अभिनेते सुबोध भावे दिग्दर्शक म्हणून पदार्पण करीत आहेत. हा चित्रपट "कट्यार काळजात घुसली" याच नावाच्या अतिशय गाजलेल्या संगीत नाटकावर आधारीत आहे. या चित्रपटात सुद्धा रसिकांना संगीताची मेजवानी अनुभवायला मिळणार आहे. या चित्रपटात सचिन पिळगावकर, सुबोध भावे, अमृता खानविलकर, मृण्मयी देशपांडे, साक्षी तंवर आणि प्रख्यात संगीत दिग्दर्शक शंकर महादेवन यांच्या प्रमुख भूमिका आहेत.