''टाइमपास २'' चित्रपट समीक्षा

''टाइमपास २'' बद्दल सांगायचे असल्यास ''दोन घटका टाइमपास'' असे थोडक्यात वर्णन करता येईल.

''टाइमपास २'' मध्ये ''टाइमपास''चीच कथा पुढे सरकते. ऐनिमेशनच्या रूपाने सुरु झालेली चित्रपटाची कथा कुठेही रेंगाळत नाही. ''टाइमपास २''मध्ये शाब्दिक विनोदावर जास्त भर देण्यात आलाय, चुकीचे इंग्रजी उच्चारण चित्रपटाची बहुतेक पात्र करतात आणि हेच संवाद टाळ्या व हसे वसूल करतात. ''टाइमपास'' मध्ये हिट झालेले सर्व संवाद ''टाइमपास २''मध्येही ऐकायला मिळतात, त्यात विशेष नविन काही भर पडत नाही. कोकणात व मुंबईच्या समुद्र किनारी चित्रित केलेली गाणी व दृश्य प्रेक्षणीय झालेली आहेत. प्रियदर्शन जाधव व प्रिया जाधव यांनी आपले काम चोखपणे पार पाडले आहे. वैभव मांगळे व भाऊ कदम हि आपल्या भूमिकेत अगदी फिट बसले आहेत. विजु माने आपल्या छोट्या भूमिकेत प्रभावीत करतात. दगडू कुठले काम करून  श्रीमंत झालाय, तो नेमके कुठले काम करतो असे अनेक प्रश्न चित्रपट बघताना पडतात पण मसाला चित्रपटात जास्त डोके चालवायचे नसते फक्त जे समोर चालले आहे त्याचा आनंद घ्यायचा असतो. शेवटी प्राजु दगडूला मिळते का? हा महत्त्वाचा प्रश्न आहे, व त्यासाठी तुम्हाला जवळच्या चित्रपट गृहात जाऊन टाइम पास बघावा लागेल.   

''टाइमपास'' मधील सर्व पात्र मनोरंजक पद्धतीने लिहिल्यात आली असून हॉलीवुडमध्ये ज्या प्रमाणे चित्रपटाच्या सीरीज बनवण्यात येतात त्याचप्रमाणे मराठीत ''टाइमपास'' सीरीज पुढील अनेक वर्षे मराठी चित्रपट सुष्टीत धमाल करेल यात मला काहीही शंका नाही. ''टाइमपास ३ '' केव्हा येतोय हे पाहणे महत्वाचे ठरेल.

काकण

उद्या ''काकण'' हा मराठी चित्रपट प्रदर्शित होतोय. या चित्रपटाच्या माध्यमातून मराठी चित्रपटांमधील सध्याच्या प्रमुख अभिनेत्रीपैकी एक असलेल्या क्रांति रेडकर दिग्दर्शका न्हणुन पदार्पण करीत आहेत. सध्या मराठी चित्रपट सृष्टीत महिला दिग्दर्शकांचे नविन पर्व सुरु झाले आहे, त्यात आता क्रांति रेडकर यांच्या ''काकण''ची भर पडली आहे. अभिनेत्रींनी चित्रपट दिग्दर्शित करणे, आता मराठी चित्रपट सृष्टिला नवे राहिलेले नाही. अलीकडे मृणाल कुलकर्णी, मनवा नाईक या अभिनेत्रींनी मराठी चित्रपटाच्या माध्यमातून आपले दिग्दर्शकीय कौशल्य दाखवून दिले आहे. 

''काकण'' हि प्रेमकथा असून या चित्रपटात जीतेन्द्र जोशी व उर्मिला कानेटकर यांच्या प्रमुख भूमिका आहेत. या चित्रपटात त्यांनी किशु आणि सुधामतीची प्रेमकहानी रंगवली आहे. ''काकण'' या चित्रपटाची मार्केटिंग अतिशय चांगल्या प्रकारे झाली असून आधीच या चित्रपटाचा ट्रेलर गाजत आहे. या चित्रपटातील जीतेन्द्र जोशीच्या लुक बद्दल ही प्रेक्षकांमध्ये बरीच उत्सुकता आहे. 

यावर्षी ५२व्या महाराष्ट्र राज्य मराठी चित्रपट महोत्सवासाठी प्रथम पदार्पण निर्मिति या श्रेणीत ''काकण''ला नामांकन प्राप्त झाले आहे   . 

प्यारवाली लवस्टोरी की दुनियादारी २ ?

संजय जाधव यांचा ''प्यारवाली लवस्टोरी'' येत्या २४ ऑक्टोबरला प्रदर्शित होतोय. ''दुनियादारी''च्या हाऊसफूल यशानंतर त्यांचा हा पहिलाच चित्रपट असल्यामुळे ''प्यारवाली लवस्टोरी'' बद्दल प्रेक्षकांमध्ये उत्सुकता आहे. ''प्यारवाली लवस्टोरी'' चे प्रमोशन सुद्धा खुप धडाक्यात सुरु आहे.

''दुनियादारी'' आणि ''प्यारवाली लवस्टोरी''च्या कलाकारांमध्ये बरेच कलाकार तेच असल्यामुळे ''प्यारवाली लवस्टोरी'' की ''दुनियादारी २'' हा प्रश्न सध्या प्रेक्षकांना पडतोय. आता तोच प्रश्न माझ्या मित्राने मला विचारल्यामुळे हा लेख. या चित्रपटाचा ट्रेलर पहिल्यानंतर मलाही हाच प्रश्न पडला होता कारण ट्रेलर मधून ''प्यारवाली लवस्टोरी'' ही एक प्रेमत्रिकोण असलेली प्रेमकथा आहे असे लक्षात येते आणि कथेतील मुख्य पात्र तीच आहेत स्वप्निल जोशी, सई ताम्हणकर आणि उर्मिला कानेटकर. ''प्यारवाली लवस्टोरी''च्या प्रमोशन मध्येपण दुनियादारीचीच थीम वापरण्यात आलीय. 

खर तर प्रेक्षकांना मनोरंजन हवय, शेक्सपीरने न्हटले आहेच नावात काय ठेवलय !!!!